Блог

Чурапчы улууһугар биллэриллибит бэйэ оҥорон таһаарыытын сылын айхаллаах арыллыыта олунньу 18 күнүгэр “Айылгы” оройуоннааҕы норуот айымньытын дьиэтигэр урбаанньыттары, тыа хаһаайыстыбатын эйгэтин үлэһиттэрин уонна уран тарбахтаах маастардары түмтэ.

2023 сыл түмүгүнэн улуус норуот уус-уран оҥоһуктарын уран тарбахтаах маастардарыгар көмө быһыытынан анаммыт бастакы Граны ылбыт СР норуот маастара Надежда Ахматова, норуот уус-уран оҥоһук маастардара Иннокентий Адамов уонна Прокопий Екечьямов оҥоһуктара, 16 нэһилиэктэн 12 уран тарбахтаахтар түмсүүлэрэ, 62 биирдиилээн киһи (ол иһиттэн 19 улуус уонна өрөспүүбүлүкэ таһымнаах норуот маастардара) кытыннылар.

Тоҕус сүрүн көрүҥҥэ (тимир, мас, туой, туос, кыл-сиэл, муос, сувенир оҥоһуктар, ат симэҕэ уонна төрүт иис хайысхаларыгар) кыайыылаахтар 1-ы, 2-с, 3-с үрдэл дипломнарын туттулар. Дьүүллүүр сүбэ бастыҥ үлэлэрдээх кэккэ маастардарга кулун тутар саҥата ыытыллар өрөспүүбүлүкэтээҕи Уус күнүн чэрчитинэн ыытыллар “Айар-тутар Саха сирэ” (Якутия мастеровая) быыстапкаҕа кыттыыны ыларга эттэ.

2025 сыл түмүгүнэн Чурапчы улууһун баһылыгын Саргыдаев С.А. Гранын туоһу суруктарын Чурапчы улууһугар норуот маастардара Олег Никифоровка «Литейная технология ювелирного ремесла в мастерской «Сиэдэрэй симэх», Наталья Гуляеваҕа “Туойдьут төлөйдөр”, Светлана Дьячковскаяҕа «Воссоздание конского убранства «Чаҥкый толору симэҕэ», СР норуот маастара Александра Оконешниковаҕа «Олоҥхо ыһыаҕын иһитэ – туос иһит» бырайыактарыгар саҥа талыллыбыт уустар уонна маастардар ассоциацияларын председателэ Таисия Титовна Брызгаева туттарда.

“Айхаллан, айылгылаах түһүлгэ!” быыстапка Чурапчы улууһугар Уус күнүгэр туһуламмыт тэрээһин буоларын туһунан “Ай” студия салайааччыта Айылгы Пинигина бэлиэтээтэ.

Чурапчы улууһугар норуот маастарын күнүн чэрчилэринэн ыытыллар
“Айхаллан, айылгылаах түһүлгэ!”
нэһилиэктэр  уустарын, иистэнньэҥнэрин икки ардыларыгар
көрүү-быыстапка түмүк боротокуола