Бу дьыл алтынньы ый 3-4 күннэригэр “Симэх” национальнай киин тэрийиитинэн, “Ай” норуот студиятын сүрүннээһининэн Чурапчы улууһун 19 үөрэнээччитэ 2-ис республикатааҕы “Эдэр уустар” (Юные мастера) норуот уус-уран оҥоһуктарыгар оҕо уонна ыччат фестивалыгар ситиһиилээхтик кыттан кэллилэр. Төрүт көрүҥнэргэ ыытыллыбыт маастар-кылаастарга “Үөрүү” оҕо сайдар киинин иһинэн үрдүкү категориялаах педагог, СР уус-уран оҥоһуктарга норуот маастара А.С.Дьячковская салайар “Иэйии” мастерской уһуйуллааччылара Карина Кривошапкина, Сандаара Шестакова, Нарыйа Собакина сахалыы иискэ кыбытыылаах тигиигэ бэйэлэрин сатабылларын үллэһиннилэр. Уһуйааччылара Альбина Семеновна “Мастерская детского творчества “Иэйии” диэн бэйэтин тус программатын презентациялаата. Үгэс буолбут тоҕус көрүҥҥэ барыта 176 кыттааччы оҥоһуктарын көрдөрүүгэ туруордулар, Саха сирин төрүт омуктарын галереятыгар икки күннээх быыстапканы 500-тэн тахса киһи сылдьан көрдө.
Көрүҥнэринэн Чурапчы эдэр уустарын ситиһиилэрэ:
Төрүт иискэ:
- Карина Кривошапкина – 1 степеннээх лауреат (сал. Дьячковская А.С.);
- Сандаара Шестакова – 2 степеннээх лауреат (сал. Дьячковская А.С.);
Тимир оҥоһуктарга:
- Дорогунов Костя – 1 степеннээх лауреат (сал. Барашков В.С.);
- Макаров Эрсан – 3 степеннээх лауреат (сал. Барашков В.С.);
Туос оҥоһукка:
- Скрябина Вероника – 3 степеннээх лауреат (сал. Скрябина С.Е.);
Туой оҥоһуктарга:
- Монастырев Вадим – 2 степеннээх лауреат (сал. Екечьямов П.А.);
- Хоютанова Дарина – ыччат саастаахтар категорияларыгар 3 степеннээх лауреат (сал. Гуляева Н.Е.);
- Абрамов Марк – грамота;
- Говорова Илона – грамота;
- Дьячковская Аделина – грамота;
Оҕо уонна ыччат айымньыта кэм-кэрдии ирдэбилинэн уларыйар, сайдар, саҥа хайысхалар да үөскүүллэригэр хааччах суох. Ол эрэн норуот үйэлэри уҥуордаан симэлийбэккэ кэлбит кэрэхсэллээх оһуора-мандара, өҥө-дьүһүнэ канон быһыытынан суолтатын сүтэрбэккэ салҕанара саха омугун уратытын көрдөрөр культурнай код быһыытынан харыстаныахтаах. Ону тэрийээччи да, ыытыллар күрэхтэри сыаналыыр экспертнай хамыыһыйа да эҥкилэ суох тутуһуохтаах дии саныыбын.
Муосчут кыыһа Айылгы Пинигина, “Ай” студия специалиһа
