Чурапчы улууһа – “Уруйдан Уус түһүлгэтэ” тэрээһиҥҥэ сыл ахсын өрөспүүбүлүкэ киин куоратыгар Дьокуускайга Норуот маастарын күнэ далааһыннаахтык бэлиэтэнэр. Быйылгы тэрээһин Улуу Кыайыы 80 сылыгар ананан ыытылынна.
Кулун тутар 3 күнүгэр, “Симэх” национальнай киин Аржакова 6 дьиэтигэр баар арт-салонугар “Үйэлэри ситимнээн” диэн СР норуот уус-уран оҥоһугун маастара Надежда Ахматова персональнай быыстапката арылынна. Чурапчы нэһилиэгин “Утум” уус дьиэтин иһинэн үлэлиир “Силик” айар мастарыскыай кыттыылаахтарын уран иистэрэ быыстапканы ситэрдилэр. Арт-салон кулун тутар 14 күнүгэр диэри бу быыстапкаҕа Дьокуускай куорат олохтоохторун күүтэр, Надежда Прокопьевна быысапка араас көрүҥэр үөрэтэр, сахалыы таҥаһы быһыыга маастар-кылаастары ыытыаҕа.
Уус дьон түмсэр түһүлгэлэрэ кулун тутар 4 күнүгэр А.Е.Кулаковскай – Өксөкүлээх аатынан Норуоттар доҕордоһууларын дьиэтигэр “Кэрэни кэрэхсээ” диэн уран тарбахтаахтар уонна модельердар айар киэһэлэриттэн саҕаланна. “Силик” мастарыскыай “бууктаах” соннорунан уонна модельер Лев Колесов Чурапчы улууһун дьахтар сүбэтигэр тикпит төрүт үгэскэ олоҕурбут сахалыы таҥастарынан кыттыыны ыллылар.
Кулун тутар 5 күнүттэн сүрүн тэрээһиннэр саҕаланнылар: “Симэх” национальнай киин быыстапкалыыр саалатыгар, маны таһынан 2 этээскэ үҥкүү саалатыгар “Айар-тутар Саха сирэ” (“Якутия мастеровая”) өрөспүүбүлүкэтээҕи быыстапка-дьаарбаҥка 15 төгүлүн хоту-соҕуруу улуустар, оройуоннар уонна Дьокуускай куорат уран трабахтаахтарын түмтэ. Быйылгы тэрээһин уратытынан творческай күрэхтэр (“Өрөгөй чорооно”, “Тууйас”, “Кылаан кылыс” уонна “Пульдьэрук” күрэхтэр) Арчы дьиэтинэн, Саха театрынан, Хотугу аҕыйах ахсааннаах омуктар судаарыстыбаннай театрдарыгар ыытыллыбыттара норуот талба талааннарын дьон-сэргэ элбэх көрдүн, суолтата үрдээтин диэн тэрилиннэхтэрэ.
Дьокуускай куорат киин уулуссатынан, Ленин проспегынан, сэлэлии хаамыыга Чурапчы улууһа быйыл хайа да сыллардааҕар тэрээһиннээхтик, 80-ча сахалыы таҥныбыт дьону киллэрэн, кытынна. Быйылгы сэлэлии хаамыы улуус тэриллибитэ 95 сылыгар ананна. Колоннаны баһылык Степан Анатольевич Саргыдаев иилээн-саҕалаан киллэрдэ, нэһилиэк баһылыктара Вячеслав Егорович Попов, Николай Иннокентьевич Аммосов, Алексей Леонидович Бурцев кытыннылар. Культура аксакала Валерий Петрович Герасимов, Чурапчыттан төрүттээх артыыстар Наталья Яковлева-Далаана, Татьяна Хомподоева, Марианна Федотова-Намыына уонна “Айылгы” ОНАДь үлэһиттэрэ Чурапчы иистэнньэҥнэрэ тикпит ураты кэрэ таҥастарынан колоннаны киэргэттилэр. Алаҕар, Бахсы, Мугудай, Төлөй, Чакыр, Чурапчы нэһилиэктэрин уран тарбахтаахтара мэлдьи да буоларын курдук көхтөөх кыттыыны ыллылар. Чурапчы улууһун делегацията “Саха” НКИХ быһа эфиригэр кыттан өрөспүүбүлүкэ дьонун эҕэрдэлээтилэр. “Киин” киинэ театрын иннигэр хаамыыга кыттыбыт Саха сирин улуустарын колонналарын, туһааннаах тэрилтэлэр тустарынан дикторскай текстэри Иван Бушков уонна Айылгы Пинигина ааҕан, уруйдаан-айхаллаан болуоссакка аһардылар. Сылын ахсын бу кэрэ көстүүлээх улахан тэрээһини Чурапчыттан төрүттээх “Симэх” национальнай киин үлэһитэ Саина Михайловна Гоголева сүүрэн-көтөн сүрүннүүр.
Киэһэ өттүгэр Саха театрыгар “Уруйдан, Уус күнэ!” диэн айхаллаах тэрээһин ыытылынна. “Ай” норуот студиятын салайааччытыгар Сусанна Дмитриевна Дьячковскаяҕа СР Правительствотын Махтал суругун бэрэссэдээтэли солбуйааччы С.В.Местников, “Силик” айар мастарыскыай салайааччыта Надежда Прокопьевна Ахматоваҕа СР норуот маастарын үрдүк аатын култуура уонна духуобунай сайдыы миниистрэ А.И.Ноев үөрүүлээх быһыыга-майгыга туттардылар.
“Айар-тутар Саха сирэ” өрөспүүбүлүкэтээҕи быыстапка-дьаарбаҥка – бу маастардар дьахтар күнүгэр анаан атыылыыр сирдэригэр эрэ кубулуйбакка, араас таһымнаах уус-иис идэлээх, айар айылгылаах дьон опыт атастаһар, санаа үллэстэр площадкалара буоларын “Симэх” НК дириэктэрэ Я.В.Игнатьева тоһоҕолоон бэлиэтээтэ.
Кулун тутар 6 күнүгэр “Народные промыслы: от традиций к развитию” диэн санаа атастаһар (диалоговай) площадка тэрилиннэ. Чурапчы улууһуттан манна “Айылгы” ОНАДь-тэн норуот айымньытын салаатын салайааччыта Елена Дмитриевна Дьячковская кыттыыны ылла, дакылаата ресурснай киин салайааччыта Д.К.Осипов сэҥээриитин ылла.
“Ай” студия түмүүтүнэн икки күннээх быыстапка түмүгүнэн номинант дипломнарын туттулар: төрүт иискэ – Колесов Лев Иванович (Одьулуун нэһ.), “Силик” түмсүү (сал.Н.Ахматова), кыл-сиэл оҥоһукка – Гоголева Надежда Ивановна (Хоптоҕо нэһ.), Логинова Наталья Афанасьевна (Болтоҥо нэһ.), ювелирнай оҥоһукка – Никифоров Олег Семенович (Чурапчы нэһ.), сыахай, сувенир оҥоһукка – Прокопьева Любовь Васильевна. Туой оҥоһукка кыайыылаах бастакы үрдэлэ иҥэрилиннэ Наталья Егоровна Гуляеваҕа. Норуот маастарын күнүгэр активнай кыттыыларын иһин СР култуура министиэристибэтин Махтал суруга Чурапчы улууһун норуот маастарыгар Павел Константинович Поповка, “Симэх” НК директорын Махтал суруга Олег Семенович Никифоровка туттарылынна.
А.М.к.Пинигина, “Ай” норуот студиятын специалиһа
