Муус устар ый 1-кы күнүгэр ыытыллыбыт тэрээһин улуус культурнай сааратар тэрилтэлэрин үлэһиттэрин билиилэрин чиҥэтэр программа чэрчитинэн ыытылынна.
Нэһилиэктэргэ норуот айымньытын дьиэлэрин кытта биир ситимнэнэн үлэлиир уран тарбахтаахтар түмсүүлэрин салайааччылара, норуот маастардара, дьоҕурдаах дьон уонна уус-уран салайааччылар кэлэннэр Чурапчы улууһугар олохтоох оҥорон таһаарыы эйгэтин уонна норуот уус-уран оҥоһуктарын 2026-2028 сылларга сайдыытын торумун уонна саҥа тэриллибит Ассоциация туһунан култуура салалтатын салайааччытын солбуйааччыта С.Д.Дьячковская, «Ай» студия үлэтин сүнньүн норуот уус-уран оҥоһуктарын уонна мындырдаан оҥорор ускуустубатын киинигэр уларытыы, уран тарбахтаахтар түмсүүлэрин үбүлүөйүн көрсө тахсар кинигэ туһунан “Айылгы” ОНАДь норуот айымньытын салаатын салайааччыта Е.Д.Дьячковская этиилэрин иһиттилэр. «Чурапчыга чочуллубут» бренди олохтуурга туһуламмыт үлэни ырытыһыы уонна ол сайдыытын түһүмэхтэрин тула санаа атастаһыытыгар “Ай” студия сүрүннүүр иисписэлииһэ С.В.Попова ыҥырда. «Ай» студия 2026 сылга үлэтин былаанын, буолуохтаах тэрээһиннэр балаһыанньаларын билиһиннэрдэ уонна сугулааны иилээн-саҕалаан ыытта салайааччы А.М.к.Пинигина. Бэйэлэрин санааларын СР норуот маастардара Татьяна Карсанаева, Владимир Дарамаев, Надежда Ахматова эттилэр. Маастардар улуус дьаһалтата олохтообут гранын туһунан, “норуот маастара” ааты ылыыга ирдэнэр перечеҥҥэ уларытыылар киириэхтэрин сөбүн, “Чурапчыга чочуллубут” бренд сувенирнай оҥоһук хайысхатыгар үлэлиир саҥалыы көрүүлээх дьону булан үлэлэһэр наадатын туһунан эппиттэрин тустаах исписэлиистэр болҕойдулар. Түмүккэ, Дьокуускай куоракка “Ытык сир” этнографическай комплекс тутулла турарын туһунан биллэриини бу үлэҕэ кыттыһа сылдьар А.Кузьмина, Л.Попова оҥордулар. Мугудай нэһилиэгин “Күбэйэ” түмсүүтэ (сал. Е.П.Катакова) бу бачыымҥа кыттыыны ылан ситии хатан бэлэхтээбиттэрин иһитиннэрдэ, култуура үлэһиттэрэ салгыы үлэлэһиэххэ сөбүн туһунан толкуга кэллилэр.
Видеорепортаж https://rutube.ru/video/07b8118b8e8b6b2ab1e5210c7fa00a05/?r=a
Фоторепортаж https://disk.yandex.ru/d/BYeo8vVnKP0f2A
