*Бу сыл ыам ыйын 5 күнүгэр Таатта улууһун Баайаҕа нэһилиэгэр саха култууратун тутаах тулаһата буолбут Моҕол ураһа уокка былдьаммытын туһунан сурах өрөспүүбүлүкэни тилийэ көппүтэ. Чурапчы улууһун уран тарбахтаахтара туора турбакка, СР норуот маастара, туосчут Александра Фоминична Оконешникова ыйыытынан-кэрдиитинэн сөргөхсүтүү үлэтигэр кыттыыны ыллылар.*
Мандар Уус көҕүлээһининэн Таатта улууһун Баайаҕа нэһилиэгэр тутуллубут туос ураһа чөлүгэр түһүүтүгэр Мугудай нэһилиэгин «Күбэйэ» түмсүү кыттыылааҕа Александра Фоминична тута этии киллэрэн, тылын ылыннаран түмсүү тэрийиитинэн улууспут туоска үлэлиир иистэнньэҥнэригэр от ыйын 24 күнүгэр маастар-кылаас ыыппыппыт, ыӈырыыбытын ылынан Алаҕар, Одьулуун, Болтоӈо, Хатылы, Чурапчы иистэнньэӈнэрэ
кыттан , сүбэ-ама ылан үлэлииргэ ылсан барбыттара.
«Күбэйэ» түмсүү 10 далбардара 4 күн үлэлээн 4 устуука 1 метрэлээх ураһа курдуу туоһун тигэн бүтэрдибит. Нэһилиэктэн кыттыспыт далбардар бүтэрдэхтэринэ Чурапчы улууһун аатыттан Баайаҕа ыытыахпыт — диэн Мугудай нэһилиэгин уран тарбахтаахтарын «Күбэйэ» түмсүүтүн салайааччыта Евдокия Петровна Катакова сонунун үллэһиннэ.
