От ыйын 4-5 күннэригэр улууспутугар кырдьык да дьоһуннаах дьаһал буолан ааста. Ол курдук, Чурапчы улууһугар СӨ народнай суруйааччыта, Былатыан Ойуунускай аатынан судаарыстыбыннай Бириэмийэ лауреата, учуутал Василий Семенович Яковлев – Далан үөрэппит оҕолоро оскуоланы бүтэрбиттэрэ 50 сылларын көрүстүлэр. Манна даҕатан эттэххэ, норуокка биллэринэн бу 1971 сыллаахха Чурапчы орто оскуолатын бүтэрбит 18-с выпустары “Кыһыл көмүс выпустар” диэн ааттыыллар.

Выпускниктар бу күннэргэ истҥник кэпсэтээри, араас дьаһаллары ыытаары Россия, Саха сирин араас муннуктарыттан муһуннулар. Көрсүһүү чэрчитинэн С.А.Новгородов аатынан Чурапчы орто оскуолатын бүтэрээччилэри кытары көрүстүлэр, учууталларын В.С.Яковлев олорбут уонна үлэлээбит дьиэтигэр сибэкки дьөрбөтүн уурдулар. Бу үөрүүлээх дьаһалларга сүрүн болҕомтону уурдулар. “Тыгын Дархан” киинэ устааччылары кытта көрсүһүүгэ уонна “Дьикти саас ахтылҕана” кинигэ сүрэхтэниитигэр В.С.Яковлев – Далан сүдү романын киинэ оҥорон таһаарыытыгар Чурапчы улууһун дьонун улахан оруолларын, Далан үөрэнээччилэрэ киинэ тахсыытыгар быһа сибээстээхтэрин туһунан РФ Федерациятын Сэбиэтин сенатора, выпуск киэн туттар киһитэ Егор Афанасьевич Борисов бэлиэтээн эттэ. Чурапчы улууһун баһылыга А.Т.Ноговицын, улуустааҕы депутаттар Сэбиэттэрин Бэрэссэдээтэлэ А.А.Захаров көрсүһүүгэ кэлбит ыалдьыттары эҕэрдэлээн туран улууспут наҕараадаларын учууталларга уонна үбүлүөйдээх выпускниктарга туттардылар.

Киинэ режиссера СӨ искусствотын үтүөлээх деятелэ, Былатыан ойуунускай аатынан судаарыстыбыннай Бириэмийэ лауреата Никита Аржаков улуус дьонугар-сэргэтигэр “Тыгын Дархан” киинэ устуутугар улахан кылааттарын, көмөлөрүн иһин махтанна. Салҕыы Далан айымньыларын киинэ оҥорон таһаарарга бэлэмин эттэ.

Бу икки күн көрүөх бэтэрээ өттүнэн түргэнник түмүктэннэ. Ол эрээри, Далан этэн хаалларбыт кэс тылларын олохторун тухары инники күөҥҥэ илдьэ сылдьыбыт ыччаттар республика, төрөөбүт улуустарын сайдыытыгар оҥорбут дьыалаларын өссө да дириҥэтэн, дьаныардаатык салҕыылларын туһунан эттилэр.

Биһиги устар бөлөхпүт (режиссер И.Бушков, оператор Д.Степанов, П.Слепцов) бу кэрэ-бэлиэ күннэр тустарынан видеосюжет оҥорон киэҥ эйгэҕэ таһаардылар.

Иван Бушков