И.Н.Винокуров аатынан «Айылгы» ОНАДь норуот айымньытыгар салаата, «Үргэл» улуустааҕы хореографтар түмсүүлэрэ тэрийиилэринэн тохсунньу 4 күнүгэр «Образовательные программы сферы культуры в рамках проведения комплексного соревнования культурно-досуговых учреждений Чурапчинского улуса» бырайыак, норуот айымньытын сайыннарыы биир кэлим былааннаах үлэ чэрчилэринэн улууска үлэлиир хореографтарга уонна үҥкүүнү толорооччуларга маастар-кылаас таһаарыылаахтык ыытылынна.
Ол курдук бу күн тэрээһини өйөөн, биир идэлээхтэрбит республикаҕа биллэр хореографтар, үҥкүү коллективын салайааччылара кыттыыны ыллылар:
- Норуот үҥкүүтүн хайысхатыгар, коллективка уол оҕону кытта үлэтин опытын үллэһиннэ — ыаллыы Таатта улууһуттан СР культуратын үтүөлээх үлэһитэ, «Дружба» оҕо үҥкүү народнай ансаамбылын салайааччыта Валентин Козлов;
- Оҕо коллективыгар үлэлиир ньымаҕа бэйэтин методикатын көрдөрдө Дьокуускай куораттан «Айыы кыһата» национальнай гимназия, «Сандал» оҕо үҥкүү народнай ансаамбылын салайааччыта, СР культуратын уонна үөрэҕириитин, ыччат политикатын туйгуна Сардаана Катакова;
- Аныгылыы үҥкүү хайысхатыгар «LibertyNation” үҥкүү лабораториятын төрүттээччитэ, республикатааҕы, бүтүн Россиятааҕы, аан дойду чемпионаттарын чемпиона уонна призера, аныгылыы үҥкүү “Афроджаз” эксперэ Егор Сивцев;
- Ону тэҥэ бу күн республикаҕа биллэр үҥкүү туруорааччы, хореограф, РФ үөрэҕириитин эйгэтин Бочуоттаах үлэһитэ, “Радость” оҕо сайдар киинин педагога Елена Сивцева, бэйэтэ туруорбут “Дьөһөгөй” үҥкүүтүн улуус хореографтарыгар туруоран опытын үллэһиннэ.
Маастар-кылаас үлэтин иһинэн улууска үҥкүү эйгэтэ сайдыытыгар дьоһун кэпсэтиилэр, уонна саҥа бырайыактар былааннаннылар.
Бу күн барыта 80 үҥкүү коллективын салайааччылара уонна үҥкүүһүттэр, ыаллыы сытар Томпо, Таатта, Мэҥэ-Хаҥалас улуустарыттан тиийэ кэлэн кыттыыны ыллылар.
“Үргэл” түмсүүбүт бары хореографтарын уонна үҥкүүһүттэрин тэрээһиҥҥэ көхтөөх кыттыыны ылбыккытыгар, ыҥырыыбытын ылынан кэлбит үҥкүү эйгэтэ сайдыытыгар туһалаах маастар-кылаастары ыытан, опыттарын атастаспыт үҥкүү эйгэтин экспердэригэр, тэрийэр хамыыһыйа аатыттан барҕа махталбытын тиэрдэбит.
