Олунньу 4 күнүгэр И.Н.Винокуров аатынан улуустааҕы “Айылгы” НАДь норуот айымньытын салаата тэрийиилэринэн, культура салалтатын өйөбүлүнэн улууска норуот уус-уран айымньытын сайыннарарга туһуламмыт сыллааҕы сайдыы былаанын чэрчитинэн, культура уонна үөрэхтээһин эйгэтигэр үлэлиир ырыа, хор коллективтарын салайааччыларын таһымнарын үрдэтэр сыаллаах-соруктаах “Мастер-класс по вокально-хоровому творчеству в рамках образовательной программы комплексного соревнования между культурно-досуговыми учреждениями СП Чурапчинского улуса” диэн тэрээһин ыытылынна. Манна Болугур, Алаҕар, Сылаҥ, Хадаар, Одьулуун, Кытаанах, Чурапчы, Арыылаах, Болтоҥо, Чакыр, Төлөй, Бахсы, Хоптоҕо, Хатылы нэһилиэктэриттэн, ырыа ансаамбылларын салайааччылара, хормейстердар, норуот айымньытын дьиэтин специалистара барыта 23 киһи кыттыыны ылла.
Маастар-кылааска хоровой искусство эйгэтигэр экспердэринэн үлэлээтилэр улууспутугар хоровой искусствоны төрүттэспит культурабыт ветераннара, биһиги улууска хоровой искусство үрдүкү чыпчаалын баһылаабыт икки коллективы салайбыт хоремейстердар: 1988 сыллаахха Хоптоҕотооҕу культура дьиэтин иһинэн Дириҥнээҕи народнай хору төрүттээбит хормейстер СР культуратын үтүөлээх үлэһитэ Попова Фекла Ивановна, ону тэҥэ өр сылларга Чыаппаратааҕы народнай хору салайбыт СР культуратын үтүөлээх үлэһитэ Лыткина Екатерина Марковна, бэйэлэрин өр сыллаах баай опыттарыгар олоҕурбут практическай көмөлөрүн оҥордулар.
Ону тэҥэ Юрий Гагарин аатынан культура уонна аныгылыы искусство киинин иһинэн үлэлиир Розинская П.К. уонна Птицын В.Я. ааттарынан тыыл уонна үлэ ветераннарын хорун солистара уонна салайааччы биир дойдулаахпыт Рустам Слепцов кэлэн хоровой искусствоны үөрэтии албастарын методикатыгар көмөнү оҥорон маастар-кылаас кыттааччылара бөлөҕүнэн ырыаны толорууга, элбэх куоласка арааран толоруу ымпыгын-чымпыгын билэн, үгүс үөрүйэҕи иҥэринэн практическай көмөнү ылан тарҕастылар.
Бу күн Фекла Ивановнаны уонна Екатерина Марковнаны, культура эйгэтигэр өр сыллаах сыралаах үлэлэрин сыаналаан туран, 70 саастарынан культура эйгэлээх бары үлэһиттэрин ааттарыттан улуустааҕы культура салалтатын салайааччыта Петр Егорович, оройуоннааҕы “Айылгы” норуот айымньытын дьиэтин директора Розалия Ивановна эҕэрдэлээтилэр.
Хоровой искусство сайдыытын тула кэпсэтиилэр ыытыллан эрэллэр. Бу ситимнээх үлэ барыта “ТАЛБА ТАЛААННАР” улуустааҕы норуот айымньытын көрүү фестиваль, норуот уус-уран айымньытын көрүҥнэринэн, жанрдарынан сайыннарар былааннаах үлэ, сылы быһа ыытыллар программа чэрчилэринэн барар.
Хайа да нэһилиэккэ, улууска хор таһаарыылаахтык үлэлиир буоллаҕына, онно уус-уран самодеятельность үлэтэ көдьүүстээх буолар. Онтон сиэттэрэн, дьон-сэргэ култуурата үрдүүр, нэһилиэк, улуус сайдыытыгар улахан сабыдыаллаах буолар.
Маастар-кылааска сылдьыбыт хоровиктарбыт, ырыа ансаамбылларын салайааччылара, норуот айымньытын дьиэлэрин үлэһиттэрэ хоровой искусство сайдыытыгар ханнык, туох харгыстар баалларын ырытыһан, улууспутугар хоровиктар түмсүүлэрэ тэриллэригэр кэм кэлбитин бэлиэтээн туран түмсэн үлэлииргэ сүбэлэһэн тарҕастылар.
