<strong>Норуот прикладной искусствотын уонна уус-уран оҥоһуктарын “Симэх” национальнай киинэ тэриллибитэ 30 сылыгар анаммыт СР норуот маастарын күнэ Дьокуускай куоракка ыытылынна.</strong>

Норуот прикладной искусствотын уонна уус-уран оҥоһуктарын “Симэх” национальнай киинэ тэриллибитэ 30 сылыгар анаммыт СР норуот маастарын күнэ Дьокуускай куоракка ыытылынна.

Чурапчы улууһун уран-мандар уустарын түмэр “Ай” народнай студия быйылгы тэрээһиҥҥэ, “Якутия мастеровая” республикатааҕы быыстапкаҕа, саҥа саҕалааччылар үлэлэриттэн таҥыллыбыт экспозициянан кытынна. Барыта 21 киһи үлэтэ дьон болҕомтотугар турда. Быйылгы быыстапка сүрүн тутула хомус тула буолла. Саха сирин биллэр хомусчуттарыгар этитиилээх хомустары охсууга тэҥнээҕин булбатах Герасим Тарабукиҥҥа уонна болгуо тимиртэн быһах охсор Анатолий Константиновка СР норуот уус-уран оҥоһугун маастара үрдүк аат туттарылынна.

Иистэнии – бу дьахтар эйгэтин биир сүрүн көстүүтэ буолар. Кэлиҥҥи кэмҥэ саха таҥаһа олус тупсаҕай уонна көрүҥэ элбэх буолла, төрүт таҥаспытын ыһыахтан ураты араас тэрээһиннэргэ, түмсүүлэргэ кэтэбит. Чурапчы дьахталлара сахалыы таҥастара мэлдьи ураты, уран көстүүлээх буолар. Саха мааны таҥаһын кэтэн сэлэлии хаамыыга Сылаҥ, Мугудай, Чакыр, Алаҕар мааны далбардара, эр хоһууннара уонна Чурапчы дьонун сахалыы таҥыннарбыт СР норуот маастара Татьяна Николаевна Карсанаева ураннаан-мындырдаан тикпит соннорун кэппит биир дойдулаахтарбыт. Дьокуускай куоракка олорор чурапчылар ыҥырыыны ылынан сыллата кыттан колоннаны тупсаралларыгар махталбыт улахан.

“Якутия мастеровая” быыстапкаҕа кыттыыларын иһин кыл-сиэл оҥоһуктарга – Ольга Седалищева (Одьулуун нэһ.), Варвара Бурнашева (Чурапчы нэһ.), Наталья Касенова (Төлөй нэһ.), Екатерина Попова (Төлөй нэһ.), төрүт таҥаска – Надежда Ахматова (Чурапчы нэһ.), тимир оҥоһуктарга бастакытын кыттыбыт Стив Попов (Чурапчы нэһ.), Николай Прокопьев, Семен Аржаков-Боло Уус дипломнарынан бэлиэтэннилэр.

Сыллата ыытыллар Саха сирин уран тарбахтаах маастарын күнэ киэҥ далааһыннаахтык бэлиэтэнэрэ, дьоҥҥо-норуокка тарҕаммыта хайҕаллаах суол. Ол эрэн төрүт үгэһи тута сылдьар тыа сиригэр олохтоох маастардар уонна билим дьоно такайар анал үөрэх кыһаларын студеннара биир таһымҥа сыанабылга тураллара табыгаһа суох. Дьон эрэбилин ылан талыллыбыт дьүүллүүр сүбэ, тэрийээччилэр бу көстүүнү болҕомтоҕо ылан, тус-туһунан сыаналыыллара ордук этэ.

Муосчут кыыһа Айылгы Пинигина, “Ай” народнай студия специалиһа.

Добавить комментарий