Бэс ыйын 15 күнүгэр, Хатылы нэһилиэгэр Арҕаа Кэлээх алааһыгар улуустааҕы Олоҥхо ыһыаҕа ыһылынна. Тимир, көмүс ууһа Ульяна Ефимовна Платонова-Уус Ылдьаана 180 сааһынан ыһыахтыыр алаас арҕаа эҥээригэр тимир уустарын икки ардыларыгар саха хотуурун охсорго “Күөттээн күүгүнэттилэр, балталаан ньиллиргэттилэр…” күөн-күрэс сарсыардаттан саҕаламмыта. Күрэҕи иилээн-саҕалаан ыытта СР норуот уус-уран оҥоһуктарын маастара, Хатылы ууһа Вячеслав Степанович Барашков. Күн арҕаалыыта уустар үлэлээн бүттүлэр, дьэ ол кэннэ бэриллибит тимиртэн охсубут хотуурдарын тургутан, хадьымал түһэрэн сахалыы сиэринэн орой үрдүнэн эргитэн аҕалан охсон көрдөрдүлэр.
Күрэх түмүгэр Кылаан кыайыылаах аатын Уус-Алдантан Егор Колодезников ылан сүрүн бирииһинэн – убаһанан – наҕараадаланна, ол кэннэ кыайыылаах 1-кы үрдэлигэр Чурапчыттан Дмитрий Барашков (15000 солк. уу харчынан бириис), кыайыылаах 2-ис үрдэлигэр таҕыста уонна 10000 солк. уу харчынан наҕараадаланна Уус-Алдан ууһа Александр Катакинов, 3-с бириистээх үрдэлгэ Дьокуускай куораттан оскуола үөрэнээччитэ Новомир Сивцев үктэннэ уонна 5000 солк. уу харчынан наҕараадаланна. Биһирэбил бириистэри ыллылар Чурапчы эдэр кэскиллээх ууһа Эрсан Макаров (Чурапчы) уонна Анатолий Иванов (Уус-Алдан). Бары кыайыылаахтарга уонна биһирэммиттэргэ республика оскуолаларын 86 сыллаахха бүтэрбит выпускниктар бэйэлэрин бэлэхтэрин анаатылар.
Эбиэт кэннэ “Оһуор киэнэ ордуга, мандар киэнэ мааныта” киэргэл-симэх оҥорооччу уустар аһаҕас күөн-күрэстэрэ буолла. Аһаҕас халлаан анныгар күндү киэргэли быыстапкалыыр кэккэ ыарахаттардааҕын учуоттаан быыстапка сарсыардаттан турбата. Дьүүллүүр сүбэҕэ СР норуот маастара Василий Попов – Бааха Уус, технолог-ювелир Андрей Гуляев, “Ай” студия специалиһа Айылгы Пинигина үлэлээтилэр. Күрэх түмүгүнэн Кылаан кыайыылаах эдэр ювелир Мария Николаева (Дьокуускай к.) уонна 30000 солк. уу харчынан, кыайыылаах 1-кы үрдэлэ Владимир Дарамаев (Чурапчы) – “Симэх” национальнай киин туруорбут бирииһин ылла, 2 үрдэл – Олег Никифоров (Чурапчы) – 15000 солк., 3 үрдэл – Нестер Онуфриев (Амма) – 5000 солк., биһирэбил бириис – Василий Иустинов (Чурапчы) – социальнай харалта управлениетын улуустааҕы филиалын бирииһин тутта.
Айылгы Пинигина, «Ай» студия специалиһа, Хатылы нэһ., 15.06.2025с.
