*Култуура уонна искусство кварталыгар — Афанасий Муҥхаалап аатынан уулусса арылынна*
Чурапчыбыт нэһилиэгэр элбэх оҕолоох дьиэ кэргэҥҥэ анаммыт арҕаа эҥээр тэриллибит саҥа түөлбэҕэ 150 кэриҥэ ыалга уһаайба анаммыта. 2025 сыл кулун тутар 12 күнүнээҕи 108 нүөмэрдээх урааҕынан Чурапчы нэһилиэгин депутаттарын сэбиэтин мунньаҕын быһаарыытынан арҕаа эҥээр саҥа тутулла турар түөлбэ өссө биир уулуссатыгар Россия уонна Саха сирин норуодунай художнига, ааттаах-суоллаах биир дойдулаахпыт Афанасий Петрович Мунхалов аатын иҥэрэргэ өй-санаа түмүллүбүтэ. Бу иннинэ саха бастакы балерината Аксения Васильевна Посельская, биллиилээх фольклорист Семен Иванович Боло ааттарынан уулуссалар арыллан, коммуникация үлэтэ ыытылла турар.
Бүгүн, бэс ыйын 20 күнүгэр, үөрүүлээх арыллыыга «Чурапчы улууһа” муниципальнай оройуон баһылыгын бастакы солбуйааччыта Рустам Романович Данилов, улуус депутаттарын мунньаҕын председателэ, үйэтитии комиссиятын салайааччыта Яков Павлович Оконешников, “Чурапчы нэһилиэгэ” тыа сирин түөлбэтин баһылыга Владимир Дмитриевич Сивцев, култуура салалтатын салайааччыта Петр Егорович Гуляев, Афанасий Петрович биир дойдулаахтарын ааттарыттан “Хоптоҕо нэһилиэгэ” тыа сирин түөлбэтин баһылыга Алексей Леонидович Бурцев, Арҕаа эҥээр олохтоохторун аатыттан “Куоҕалы” ТОС салайааччыта Федора Самсоновна Седалищева эҕэрдэ тылларын эттилэр. Аныгы искусство арт-галереятын уонна култуура хайысхатыгар бырайыактыыр үлэни сүрүннүүр «Чолбон» коммерческайа суох тэрилтэ (сал. Дьячковская Е.Д.) ааттарыттан бу түөлбэҕэ олохсуйуохтаах Ольга, Семен Собакиннарга Афанасий Мунхалов «Саҥа олох саһарҕатыгар» (На заре новой жизни) өҥнөөх литографиятын репродукциятын бэлэх ууннубут. Ытыктыыр биир дойдулаахпыт барельефтаах, аата-суола уонна куйаар-кодунан информация суруллубут бэлиэ үрүҥ үрумэ сабыытын улуус уонна нэһилиэк салалтата арыйда. Эдэр ыал кырачаан кыыстара күөх от быыһыттан бэйэтин курдук саҥа тыллан эрэр кырачаан сардаана сибэккини булан үөрэн даллараҥнаан үтүөнү түстээтэ.
Түмүккэ Чурапчыбыт нэһилиэгэр саҥаттан саҥа уулуссалар ааттана турдуннар, улууспут чулуу дьонун, суолталаах историческай чахчыларын үйэлээх өйдөбүллэрэ өлбөөдүйбэтинэр диэн этэн туран түгэни үйэтитэ бука бары хаартыскаҕа хатанныбыт. Чахчы даҕаны бу түөлбэттэн төрүттэнэн “Култуура уонна искусство квартала” сириэдийэн улааттын-кэҥээтин! Сарсыҥҥыбыт саргыланнын, кэнчээрибит кэскиллэннин! Үрүҥ тунах ыһыах ыллыктаахтык ыһылыннын, Айыы сыдьаайа сандаара арылыйдын, Алгыс баһа сыаланнын!
Айылгы Пинигина, «Ай» народнай студия специалиһа, «Муҥхаалап куйаара» аныгы искусство арт-галереятын быыстапкалыыр үлэтин сүрүннээччитэ.
20.06.2025 сыл
