Тохсунньу 18 күнүгэр «Айылгы» норуот айымнньытын дьиэтигэр Таҥха хаан ыйыгар өбүгэлэрбит үгэстэрин сөргөхсүтэн, саха төрүт итэҕэлигэр олоҕуран оҕолорго, ыччаттарга аналлаах «ЛЕГЕНДЫ ПРЕДКОВ – ӨБҮГЭ КИСТЭЛЭҤЭ» бырайыак ыытыллан ааста.
Бу күн оҕолорго Саха Республикатын культуратын үтүөлээх улэhитэ, алгысчыт Валерий Петрович Герасимов уонна СӨ култууратын үтүөлээх үлэһитэ, Чурапчы улууһун бочуоттаах олохтооҕо, Олоҥхо киинин салайааччыта Дмитрий Дмитриевич Попов саха омук итэҕэлин, номохтору, үһүйээннэри сырдаттылар, Чурапчы улууһун ааттаах олоҥхоһуттара Николай Никитич Григорьев, Сусанна Васильевна Лазарева, Анатолий Николаевич Христофоров, Николай Романович Дьячковскай уонна кэлэр көлүөнэ олоҥхону толорооччулара Кристина Максимова, Айыына Евграфова, Саян Максимов олоҥхолоон иһитиннэрдилэр. Морфунов Семен Семенович, Яковлева Елена Егоровна, Дьячковская Валентина Ивановна оһуокай түһүлгэтин оройуттан туттулар. Маны таһынан оҕолорго остуол уонна өбүгэ оонньуулара ыытыллыннылар. Өбүгэ оонньууларыгар 3 көрүҥ ыытыллынна (тутум эргиир, ойбонтон уулааһын, мүһэ быладьаһыы, биһирик сүүрүү) уопсайа 8 оҕо кыттыыны ылан I-кы бочуоттаах миэстэҕэ Пономарев Вася 5000 тыһыынчалаах сертификатынан, II-ис миэстэ Захаров Никита 3000 тыһыынчалаах, III-үс миэстэ Филиппов Женя 2000 тыһыынчалаах сертификаттарынан наҕараадаланнылар. Остуол оонньуутугар хабылыкка, хаамыскаҕа уопсайа 11 оҕо кыттыыны ылан I-кы миэстэҕэ Тина Катакинова 5000 тыһыынчалаах сертификатынан, II-ис миэстэ Скрябина Сандаара 3000 тыһыынчалаах, III-с миэстэ Дьоллоохов Арылхан 2000 тыһыынчалаах сертификаттарынан наҕараадаланнылар.
Таайтарылаах Таҥха түһүлгэтигэр оҕолорго Саха Республикатын култууратын туйгуна Пинигина Айылгы Муосчут кыыһа оҕолорго таҥха туһунан кэпсээтэ, күлүк көрүүтэ ыытыллынна.
Бу бырайыакка кэлбит оҕолорго тэрийээччилэр сахалыы астартан минньигэс бокс оҥорон күндүлээтилэр.
Кэнчээри ыччаттарбытыгар өбүгэлэрбит үгэстэрин өйдөтөр сыаллаах тэрээһин ыытыллынна.
Суруйда фольклор сүрүн специалиhа Марианна Диодорова
