Олунньу 10 күнүгэр «Айылгы» улуустааҕы норуот айымньытын дьиэтин иһинэн үлэлиир «Планета Мунхалова» аныгы искусство арт-галереятыгар Саха сирин биллиилээх худуоһунньуга, норуокка биллэр таптанар ойууһут, живописец, Россия худуоһунньуктарын союһун чилиэнэ, Саха республикатын искусствотын үтүөлээх деятелэ Андрей Чикачев персональнай выставкатын үөрүүлээх арыллыыта, худуоһунньук талааныгар сүгүрүйээччилэр галерея иһигэр тобус толору тоҕуоруһа мустан ыытылынна.
Үөрүүлээх тэрээһин «Айылгы» НАДь специалистара айан оҥорбут Андрей Чикачев хартыыналарынан видеоролигынан арыллан дьон-сэргэ сэҥээриитин ылла.
Худуоһунньук персональнай быыстапкатын үөрүүлээх арыллыытыгар улуус дьаһалтатыттан кыттыыны ыллылар Чурапчы оройуона муницальнай тэриллии баһылыга Саргыдаев Степан Анатольевич, культура салалтатын салайааччыта Гуляев Петр Егорович, ону тэҥэ культура уонна үөрэх тэрилтэтин салайааччылара, оҕо искусство оскуолатын үөрэнээччилэрэ, «Мичил» уһуйаан иитиллээччилэрэ, биирдиилэн искусствоны сэҥээрээччилэр. Андрей Чикачевка А.П.Гоголев аатынан оҕо искусство оскуолатын иитиллээччитэ Сайаана Софронова «Эбээм ытарҕата» диэн автор үлэтин үтүктэн уруһуйдаабытын авторга бэлэх уунна(преподавателэ Захарова К.К.).
Быыстапканы Айылгы Муосчут кыыһа автор Андрей Чикачевтуун иилээн-саҕалаан ыыттылар.
Бу күн быыстапкаҕа 150 тахса киһи сырытта.
Быыстапка олунньу 10 күнүттэн 17 күнүгэр диэри үлэлиир.
