Тохсунньу 23 күнүгэр “Айылгы” оройуоннааҕы норуот айымньытын дьиэтигэр сахалыы маанытык таҥныы-симэнии кэм-кэрдии уларыйыытынан сайдыытын туһунан Саха сиригэр гуманитарнай чинчийии уонна хотугу аҕыйах ахсааннаах омуктар проблемаларын институтун “Арктика киһитэ” лабораториятын научнай сотруднига, этнограф Александра Николаевна Прокопьева “Саха мааны таҥаһа-симэҕэ үйэттэн үйэҕэ” диэн киэҥ ис хоһоонноох лекцията буолан ааста.
Лекцияны тэҥэ ювелир Петр Алексеев мастерскойун быыстапка-дьаарбаҥката Чурапчы улууһун дьахталларын болҕомтотун тартта. Эргэ көмүһү аҕалан ыйааһынынан атастаһан, маастар үлэтин иһин төлөөн, норуот айымньытын дьиэтин фойетыгар омуна суох “биэс киилэ көмүһүнэн” харах туолла, сүрэх манньыйда. Билим чинчийиитин, республика түмэллэрин фондаларын үөрэтиини кытта дьүөрэлии чочуйуллар саха норуотун сиэдэрэй симэҕэ хас биирдии Чурапчы куотугар, мааны далбарыгар баар буолуутун ситиһээри тэриллибит тэрээһиҥҥэ 40-ча киһи сырытта. Өссө да маннык хабааннаах үлэ нэһилиэнньэҕэ анаан ыытыллыытыгар, сүрүннээн эдэр дьону хабыытыгар өйбүтүн-санаабытын түмэбит.
Муосчут кыыһа Айылгы Пинигина,
“Ай” народнай студия специалиһа.
24.01.2024с.
